2Jo | APZ | STEP |

2 Joun Olo Iyoswo Tɨfinjo loso Joun Afahwo Mtɨ'mokumentisofoho.

Olo Hungkuno Sɨmo'mjofoho.

Jisas ahwomomne'no nto sɨmentiso sohonta soswosikɨsɨti'nji (60)sikɨsɨti-sikɨsɨ'nji (66) nto uyakolo'mentiso ajwo sopolɨkeno olo iyoswo tɨfinjo loso Joun afaohwo mtɨ'mokumentisofoho. Olo iyoswo loso a'mu anga'nohino syine'no mtɨ'mokumentisofoho. Oso hisi nehopi a'amu anga'nohinyinetɨkeno. A'amu fiso hofɨkoe hunoso ole, A'amu Jisasɨmo inɨngkunyo temtitofo hopa imo'nohumunyo somne'no mtɨ'mokumentisofoho. Joun oso a'amu homo somo a'amu hwasyo hungkuno'njo somne'no i'waho ito'no fiyɨmno ulɨmonto mtɨ'mokumentisofoho. Olo iyoswo loso ntɨpo humanto mtɨ'mokumentisotɨkeno. Ango kako nohumanto olo iyoswo loso mtɨ'mokumentiso so'no malinyofoho. Oso'no nakwo olo hungkuno homo lomo atofo lɨhwasi tɨfi unɨngkohwano.

2 John

1 Ngko Anɨtuye mehomi somo mokosyohumawo'nɨngkohe sohwo'ni olo iyoswo loso mtɨ'mokalokweno. Kɨko a'mu siki, Anɨtu kakoe syohomne'no kuhwosopo'mentiso sikinonji jɨje mehomi sohwantnne'no olo iyoswo loso semtɨ'mokiyalokweno. Yahino nehopi'nohino somo ngko kakine'no sɨmeho kijopalokweno. Oso hiso ngko'nohinɨ'maho. O'o, a'amu hopi'nono Anɨtuye hungkuno ne'njo somo huno'njo so'nji hofɨko sekune'no sɨmeho umo'nalofoho. 2 Jisas Kɨlaisɨye hungkuno ne'njoso nakwoe sɨmehomo wojo so'no nakwo sekune'no sɨmeho namo'nɨwo'nɨngkohoho. 3 Mpohwo Anɨtu'nji kakoe Hwomu Jisas Kɨlaisɨ'nji siko nakumne'no wopɨngo nalohofohosɨsi hitoho ulofɨhwoso'no humayo wopɨngo nejapohosɨso'no nakwo hungkuno nehopi'nohini hnnɨngkuhwasi sɨmeho afa unantanoho.

Nakwo hitoho nalofo yahino somo unɨngkowano.

4 Jɨje mehomi fehohnjoso hofɨko Anɨtu kako yahino ne so'no nalɨmentiso hopaso hofɨko kakoe honɨngkano ne somo inɨngkowalokwofo. Oso hiso'no nupa'nonji ngko sɨmonyo yalokweno. 5 Oso hiso'no ngko, nje nampohwo siki, olo so'no wakilɨmonne'no yohono. Nakwo nom'ne a'amu somne'no sɨmeho uyo yahino hiso songo'maho. O'o, nakwo Anɨtuye hungkunoso sɨmo'mo upo'noma'mentɨhwone oso mta'angofoho. 6 Hitoho ulofo yahinoso olenoho. Nakwo Anɨtuye honɨngkanomo tɨfi unɨngkowano. Hohonta olo honɨngkano loso upa'nɨmentɨhwoni, Sekwo nom'ne a'amumne'no sɨmeho umo'nyo yahino somo finɨngkamno.

Nakwo Kɨlaisɨye hungkunomo aho yokumpohn'nyo wokemokosyohumano.

7 A'amu pi'nɨngo engoso hofɨko nakumo hwasyo hungkuno nelane'entɨfi ango'meemo lɨku'mofalokwofo. Oso'no hofɨko nakumo ole nelalokwofo. Jisas Kɨlais Anɨtu sohwo kako nakwoe hwaho lopo a'amu imo'nɨmentiso'maho. Hofɨko nakumo ose nelalokwofo. Oso a'amu hiso hofɨko hwasyo hungkuno lɨwo'nɨngkohofoso Kɨlaisɨye mango hwafoho. 8 Sekwo soku, oso a'amu ose sohwamne'no i'waho nto'no fiyɨmno. Hwapɨngoso sekwo Anɨtuye syoho yokumpohn'nyo iwo'nɨngkohofo so'no Anɨtu kako ngko sekumo yo'mayoso wosejapmmo selɨmentisoso sekwo hwasyo hungkuno homo somo inɨngkafijo'manji sekwo momapitnnehofo. O'o, sekwo Anɨtuye hungkunomo nto'no inɨngkafijoso u sekwo yo'mayoso womantɨfeho. 9 A'amu fihwo kako Kɨlaisɨye hungkunomo aho yokumpohn'nyo mokesyohumayo'njo yoso sohwo kako hungkuno nom'ne kengomo inɨngkaweso'manji osohwo Anɨtu kako'nji mohumuyoho. Hwe fihwo kako Kɨlaisɨye hungkunomo aho yokumpohn'nyo kemokosyohumaso osohumo Anɨtu'nji kakoe hwomu Kɨlaisɨ'nji siko'monta'i siko kako'nji humasiyo. 10 U hwe fihwo kako sekumo se'maso sohwo kako sekumo Kɨlaisɨye hungkuno masejo'njo ihwosi kako nom'ne hungkuno kengo selɨhwoso'no osohumo sekwo kakimo sekwoe ango'mno ipemotakutoho. Sekwo nakwoe a'amuhwe eso nulɨkutoho. 11 A'amu fihwo kako oso a'amu hwasyo hungkuno'njo osohumo nje a'amuhwe uloso sohwo kako oso hwe hwasyo hungkuno'njo sohwoe syoho somo ufo'malofoho.

Hungkuno ae'uyofoho.

12 Ngko hungkuno sawemo waselɨmonji ko yoheso u olo hungkuno hiloso ngko iyoswomo mamtɨ'mokumnehono. O'o, ngko sekumo se'mahm'mo ngko sekwo'nji hungkuno hnnɨngkuhwasi nakwoe sɨmehoso wopɨngo wonamo'nɨmontonoho.

13 Anɨtu kakoe syoho somne uhwosopo'mentisoso jɨje nanohwo esɨ'nji kakoe mehomi so'ntnne'no nakwoe a'amufo selalokwofo. Nje hungkuno osohopeho. Ngko Joun'ni mtɨ'mokohono.